2020年6月25日星期四

[露營裝備] [露營用品] SUREFIRE G2X PRO DUAL-OUTPUT LED FLASHLIGHT 電筒4 (行山, 探險, 防身)

SUREFIRE G2X PRO DUAL-OUTPUT LED FLASHLIGHT

除左以前係電器舖同十蚊店 (以前係10蚊) 買嘅電筒仔,入3A 或2A 電的普通電筒,之後所接觸的都已經係入鋰電的LED 電筒,當時的NITECORE 同 FENIX 都已經推出左好多款好多型號的電筒,果陣時都有聽過SUREFIRE 的大名,不過一睇到價錢就已經不在考慮之列,公道D 講,其實唔止價錢貴,而係佢係市面賣的電筒功能都同大陸造的差一大截,曾經有一兩次衝動都想買一兩支當係收藏,都已經等到舖頭執笠清貨咁濟,最後都係無買到,價錢貴接近一倍,功能偏偏寥寥可數。

今次入手有兩個原因,第一係舖頭大減價再加1 蚊送電池,第二係有鍾意的顏色可選擇,因為之前買落的電筒差不多9 成都係黑色,呢次買左支黃色,之後再買多支沙色,美中不足係所用的原裝鋰電池123A 並非充電池,即係用完就要囉去回收,其實坊間都已經有可充電的CR123 鋰電池賣,叉電機都有推出,口碑就比較參次,都係等我用晒買落的電芯先再作決定。

今次買呢支SUREFIRE G2X PRO 體積大細重量都適中,使用兩粒123A 鋰電池,但只有兩個光度,15流明和600流明,亦因為只有一個開關掣,按第一次就出15流明,關閉再開就出600流明,無記錯的話,係有另一款型號的先後次序係掉轉,先開600流明,再開先15流明。不過作為備用/收藏的電筒就無乜所謂。除此之外,就再無其他功能,連爆閃(頻閃) 都無,唉!雖然防水等級IPX7,可在水下一米使用,但沒有標明時間,個人建議不應長時間停留在水中。