2018年10月10日星期三

[露營裝備] [露營用品] 戶外照明裝備 - 頭燈2、營燈2 (行山, 探險, 防身, 露營燈)

不經不覺呢個網誌寫左一年有多了,其實好多產品工具都有所提升或更新,自己亦忍唔住手,有特價或開倉都會唔覺意帶左返屋企,所以集合一次過寫下近期新買的照明裝備。

頭燈
Black Diamond Storm (350 lumens)
都唔知算係邊年出,包裝盒無寫,唯有用最高流明區分,沿用上一代款式設計,最高亮度增至350流明,功能和使用跟上一代差唔多,依舊有PowerTap功能,加入了藍光,藍光頻閃,頻閃相對比較少用,而紅綠藍三種光各有用途,紅光用作夜間活動,避免光線太強影響其他人,綠光可用作看螢火蟲,可避免搔擾到其他動物,藍光用作打獵時睇血跡會較清楚。防塵防水依舊達到IP67,完全防塵及可以潛入水中1米最多30分鐘。




Black Diamond Spot Headlamp (300 Lumens)
第一次買呢款頭燈,最高流明和功能都比Storm 少,最高流明只有300流明,同樣有PowerTap,只有紅光及紅光頻閃,當然價錢亦平一點,不過亦有過人之處,就是防護等級達IPX8,即表示可以潛入水中超過1米最多30分鐘,就係呢個原因買一隻用黎落水玩之用。




Black Diamond Revolt Headlamp (130 Lumens) (Rechargeable)
這一款頭燈,係我一直誤會佢的頭燈,只怪自己拎起產品上手都無睇清楚,我一直以為係內置電池,所以唔太想買,怕一壞就成隻頭燈報銷,而且價錢都偏貴,直到係開倉我先買左呢款頭燈,原來發現佢其實係用充電池,只不過係充電池放係入面可以直接用USB 叉電,當時已經係舊款,不過唔緊要,都係買俾老婆使用,主要用途係等小朋友訓晒覺夜間行動打機睇手機之用,所以流明唔使咁高。

款式跟舊款Storm 一樣,其實我覺得呢隻款型仔D,沒有PowerTap,PowerTap位置變了USB 充電位,可以使用3枚3A電池,或用3枚原裝Rechargeable NIMH電池,使用3A電池最高130流明,如使用原裝Rechargeable NIMH電池就最高只有90流明,操作同Storm 相同,不過只有紅光及紅光頻閃,防護等級只有IPX4,大約只有被水滴潑濺的防護程度。




營燈
e-zone 1049期別注版 - 多功能 LED 夜燈 / 營地燈
露營燈連雜誌合共$49,十分抵玩,e-zone一向QC 唔錯,所以都買一盞玩下,減去雜誌價錢,都係$34,雖然知道係淘寶貨,但拎上手又覺得唔錯,提供5種亮度模式 - 高亮、中亮、低亮、快閃和慢閃,燈底座備有磁鐵吸附功能,亦有掛扣設計,採用磨砂燈罩,使 LED 光線柔和,唯獨光線顏色偏黃,亦沒有亮度流明,續航能力等數據,網頁介紹只提及生活防水,採用3枚3A電池,不過性價比算是十分高,粗用一流,體積大小亦適中,只怕露營使用會續航力不足,但放在家中作應急之用就認真不錯。




Black Diamond Moji XP Lantern (150 Lumens)
HKTV 特價活動時買入,之前一直猶豫想買入細小的營燈,掛在煮食桌上照明,不過入手這個營燈後,覺得太大,光度勉勉強強,最高亮度150流明,設計簡單,只有開關按鈕,使用3枚2A 電池,有掛扣設計,防護等級只有IPX4,最後送給老婆作夜間看手機打機之用。




FENIX CL20R
體積細小輕巧,卻有著最高光度300流明續航6小時的能力,內置1600mAh 電池,以Micro USB 充電,底部有磁石可吸附在鐵質金屬上,亦有掛扣設計,除白光外,仲有紅光及紅光頻閃效果,防水級別IPX6,基本上可防雨水,1.5米防摔,比較少營燈會有提及的防護能力。





luminAID Packlite Spectra
玩味較重的一款,體積比Packlite Max細一點,產品完全沒有提及最高光度,不過光度亦明顯比Packlite Max暗,網頁只說明以開關按鈕輪流轉換7種顏色的光、彩色漸變或白光,充滿電後使用白光可以維持3至5個小時,如日間在太陽光底下充電需要10小時,防護等級達IP67,完全防塵及可以潛入水中1米最多30分鐘,但其實產品多數會浮在水上:p,產品100%不含PVC,所有組件均無鉛且符合RoHs標準。






Black Diamond ReMoji Lantern (100 Lumens)
極度輕巧細少,內置鋰電池,電池容量不詳,最高亮度100流明可維持10小時,接駁USB充電需3小時充滿,雖然光度略嫌不足,但以這個體積和顧及續航能力,都算是不過不失,用於營內,或家中夜間使用亦十分適合,除必備的掛扣設計,還加上四粒小磁石,可吸附鐵質金屬上。除此之外,此燈亦可以作為氣氛燈,白光模式下按兩下會跳到彩光模式,再按兩下會跳到彩光漸變模式,此時按一下就會選擇(停在)當前的顏色,下次彩光模式亦會以此色出現。其實呢盞燈係老婆買俾自己用,貪佢夠的骰,所以大大隻的Moji XP 就俾返我。