2017年12月22日星期五

[露營生活] 灣仔南渡聖誕 (2017-12-22 至 2017-12-25)

第一晚
聖誕節又有連假,剛好天氣幾好氣溫唔算太凍,又係出發的時候,今次膽粗粗打算夜晚先入營地,就係冬至當晚,我同老婆都早放,返到屋企仲可以沖涼食埋飯,不過仲要等阿B 搭車過黎幫手囉野,有阿B 幫手,今次帶埋張Snowline 細枱,阿B 到左食D 飯就出發,不過冬至夜好難搵的士,我行左出去巴士總站截,截左架綠的,話要做冬拒載唔入黃石,後尾好彩截到架紅的肯車我地,再入返村兜佢地同搬行李上車,就直入黃石碼頭,時間剛好比舅公佢地早少少到,大家會合舅公約好船家,坐大飛入灣仔南。

去到好彩比想像中氣溫唔算凍,去到仲有大把位置揀,最後揀左較入的地方,相對少D 人出出入入行黎行去。

原先諗住夜晚,起左營先,第二日先起天幕,不過好快手就起晒三個營,仲左揀右揀位置,最麻煩係個地下好硬,好多釘都係打得入一半,真係搞唔掂,見仲有時間,就決定起埋個天幕,不過今次有個新天幕,係一個雙塔型可以變身的多功能天幕,搞到大家討論左好耐應該點起,最後都係用黎罩住本身的4人營,再係剩返的空地起埋舅父個天幕。

第一天早上
昨晚雖然夜訓,但因為人唔算多,訓得唔錯,起身即刻幫D 營同天幕影相,因為阿媽成日提住天幕D 風繩落位好D ,唔好KICK到自己,今次舅父除左起得快,仲起得四四正正,空間夠晒。

媽媽一早起身就煲水、沖野飲、煮早餐同打機。

一定要影下個新天幕,雙12 買入,唔使一千人仔,20D尼龍塗硅,算抵玩,之前睇開的自由之魂要三千幾人仔。

舅父的超遮光營

香港品牌的蜥蜴仔營,用鋁骨同全蚊網內脹,其實都幾好用。

怕天氣太凍,帶左朱古力黎增加熱量。

煲水沖野飲同整早餐都要分好多次

純粹自拍

大女同細佬都起左身,黎個偷拍。

裝備只有愈黎愈多

粉紅色系

家姐的新朋友

呢個充氣梳化吸引左好多隔離營的小朋友

第一天下午
去灣西行下

今日好多牛



今日星期六,人仲未算多,應該陸陸續續會再有人入黎。

黎灣西次次都係影Wide Shot 今次襯人少少影下人地的營。

不斷有人到埗

村長位,自然有一條村的規模。

總部

自拍一張

呢面影到LOGO,食風位落多兩條風繩。

襯佢未污糟未發黃影張相

家姐同朋友仔玩,無咁悶~

第一天黃昏
玩樂中的舅婆同家姐

上幾次都無試過影黃昏相

個個著燈聖誕氣氛出黎喇~

呢個角度都影闊D 影埋個海

第一天晚上
用左好多次的燒烤爐,三十幾人仔,超值~

BBQ 係取暖的最佳方法

食材

食飽睇YOUTUBE

隔離營好花心思整的聖誕樹,借黎影左幾張相

太黑,落閃補返張

第二天早上
一朝早無太陽好凍,之後慢慢薄雲散開出太陽,天朗氣清,一早D 人陸續咁黎,咩位置都唔放過。
較出面的地方都佈滿營帳

Note 8 的360相唔同iPhone 6S Plus, iPhone的做唔到完整360,Note 8 做到但又唔識停,會過左龍~ 要研究研究~

碼頭去灣西的大路仲未被佔據,可能國內無聖誕期假,今次聖誔真係比國慶少左強國人,我諗九成五都係香港人。

向較入位置影,營帳無咁密集

不斷都有大飛駛黎灣南

雖然有太陽有藍天,但都有一層煙霞,每次影過去對面都係朦朦朧朧。


第二天下午
雙塔天幕的入口位,裏面剛好放到一個Luxe Safari R4,仲有少少空間放野同出入。

家姐的朋友仔雅雯黎學玩UNO,B 叔叔悉心教導。

好彩有舅婆幫手同佢地玩,等我有多D 時間做其他野。

雅雯小妹妹好乖,好斯文~

層層疊

層層疊

出發去海下探索~

受保護的海下灣,基本上乜野都唔做得。

條路好明顯,應該經常有人行黎~

海下灣的紅樹

呢邊當風,家姐同舅婆留係岸邊玩,爸爸同舅公四圍看看。

水好清,風景唔錯,不過好大風。

呢邊有個沙灘仔

呢邊有個仲細的灘仔,舅婆同家姐係沙上寫字。

石堆

不淮釣魚

行左去較遠處的石灘上的一舊大石,舅公徒手就爬左上去,身手不凡~

離開海下灣,貪得意走入大灘郊遊徑,遠望見到灣仔南,再行前少少就發現個大沙灘。

沙都算幾靚,水又清,成個沙灘又寛闊。

初時都混淆左以為同上次果個灘一樣,後尾發現原來係第二個灘黎~

望出去的風景剛好對正蚺蛇尖

可以做籠俾金絲貓住的蘆兜葉

又有地方俾家姐走動下

同舅公對打

返返營地,忍唔住影下個藍天綠樹

同夏天比係完全唔同,不論天色或是葉的顏色。

隔離的戴生一家人離開後,黎左對情侶,放左一個營同一個小天幕。不過再入D 的另一邊,突然插針式起左三個營,多左班細路,仲係我個天幕隔離踢波,將D 營起係條路道,留個空間俾佢地係度玩,因為D 釘打唔入,支支都飛晒出黎,阿媽已經好心提左佢地好多次,都係唔聽,整親插傷後果自負,最衰就係明明中間有條路,係都要起營起到逼一逼,就係人地範圍,營同天幕之間穿過行黎行去,真係咁厚面皮。

第二天晚上
夜晚去左探險,不過無功而還~

順道去左灣西行下,都唔算好多營,未爆~

黑到影唔到相,震晒~

第三天早上
尋晚臨訓隔離營個有小朋友發惡夢係度喊,好辛苦先入睡,半夜又有個痴線佬飲碎酒講粗口,訓得斷斷續續,七點幾又醒,八點幾又醒,隔離D 靚仔又係度玩,嘈住晒,訓唔返~
今日天氣都唔錯~

入面多左的營,明明隔好遠,但夜晚真係好應聲。

同家姐自拍一張

NOTE 8 的前置鏡頭影的相,內置了美顏功能,執到塊面滑劣劣~

第三天下午
食完粥開始執野,B 哥的朋友黎到,接力繼續用呢個營位,家姐仲同姐姐哥哥們玩左陣啤牌,收天幕同行去碼頭果陣仲多得佢地相助,我地亦借左燒烤爐,繩同兩張月亮椅俾佢地,三日三夜的露營樂又完結,可能經驗多左,呢次執完野都唔覺得太攰。不過返到去都係有D 唔舒服~ 好彩听日都係假期,訓返一晚靚覺,第二日無事又出街。