2016年10月29日星期六

[露營生活] 20年後再次露營@鶴藪營地 (2016-10-29 至 2016-10-30)

同阿媽和舅父舅母經過商量多時,最後選擇一個最方便的營地 - 鶴藪營地,為第一次去嘗試的露營地點,準備功夫都做到足,最怕係太多人無位札營,因為會燒野食,所以都算幾重裝,不過因為Call Van仔直到目的地,而舅父就有車,所以去程回程都唔算辛苦。

第一日早上
因為第一次去呢個營地,舅父一家一早9點鐘左右就到步,我地約左VAN仔九點半,十點半前到,真係好方便,落車行上斜路就到,我地去到舅父已經札好營,當時舅父仲用緊唔防水的速開營,坐著等我們,大家都好重裝,我帶了兩個營加天幕,仲有三張月亮椅一張枱,全部都係第一次用。各自都帶左凍肉黎燒野食、煲、餐具和爐黎煎蛋煮麵,舅父帶左太陽傘同冰箱。

背囊都係新,藍色係VAUDE Brenta 50,綠色係VAUDE Asymmetric 52+8,第一次用,不過一星期前已經開始PACK野,今次老婆同細女無黎,所以一人一個背囊,大女的背囊都係VAUDE Puck 10,三個都係大減價果陣買,雖然減左價但都幾貴,不過貨真價實,又幾好用同埋幾靚~


年紀大又帶小朋友,最重的東西都係放車仔推著走算了
雖然人多好辦事,但起天幕都傾左好耐,又雞手鴨腳又轉過位置,之後真係落雨,真正考驗天幕同兩個防水營,而舅父兩個營就頂到一陣,最後要用膠枱布幫一幫手,不過營底都係濕了。

初時天幕係遮住石枱,方便食野果陣擋太陽,之後仲擋埋雨水。


兩個營都係第一次用,樣子本應很好,不過外帳門口位無落釘或落得唔夠遠,搞到怪怪的模樣。


以前燒野食必帶的太陽傘,舅父帶埋黎露營。


之後天幕轉左位置,遮住燒烤爐,順便測試下呢個天幕的耐熱能力。呢個營位自成一角,條天幕繩釘到咁都唔驚影響到人。


入黑時份影一張,大家都開始燒野食。


呢個營位連石枱連燒烤爐,十分方便。


話名四人營,但其實放三張床墊後只剩返少少位。


自動充氣枕頭同自動充氣床墊,都係大減價果陣或者用COUPON買,平左都係貴,不過我鍾意一步到位,買好少少。


第二日下午 - 鶴藪營地的環境一覽
鶴藪地方雖大,但人亦多,由於交通實在方便,經常爆滿,露營友冠以難民營之稱。

左圖是營地的入口,右圖沿路走可到洗手盆、廁所及營地其他部份。









鶴藪營地環境優美,係交通太方便,人流太多經常爆滿。

2016年10月8日星期六

[露營生活] [露營裝備] [露營用品] 爐具測試, 首開二人營 (2016-10-08)

籌備多時的露營用品都買得七七八八,前排買左兩個營 - Luxe Safari R4 四人營、Triton Tribal 2 二人營,同埋一個天幕 - Triton Tarp D1212,因為Tribal 2 輕D,所以帶左佢同埋個天幕上山試下起,仲帶埋超輕便的爐頭同煲 - SOTO Regulator Stove ST-310 同 Snow Peak Titanium Trek 1400。

20年無露過營,初初真係雞手鴨腳,又遇啱有d 風,又乜準備都無,營釘都被我踩攣左兩支,個天幕起唔到,個地下有D 硬(瀨地硬),有石屎落唔到釘,因為唔係官方營地,所以都無謂勉強。



呢個雖然係二人營,但係相當寬敞,210cm x 120cm的空間擺兩張營墊都仲有空間可放背囊雜物,高度110cm 空間更多,二人營黎講算唔錯。

而阿媽同老婆就幫手試下個爐,起碼都要識得開個爐,費事第時真真正正露營就雞手鴨腳,日本野係唔同D,爐頭個火可以微調,個火容易D 控制,GAS都襟用D。




而兩位小朋友同埋一位鄰居朋友仔係戶外玩完就走入個營到玩,同我地大人一樣對於佢地黎講呢樣係新奇的東西。